Oté

Nou sar biento dann l’obligasyon plante do ri an kantité, épi an kalité

Justin / 6 avril 2021

JPEG - 43.6 ko

Mézami mwin la vi in kékshoz dann télé na pwin tro lontan é sète afèr-la, la bien intérèss amwin. Kossa i lé ? Sinploman in pti plantasyon dori dann la komine Sin-pol : sé in l’assosyasion ké la déside plant dori é d’apré sak mwin la vi lo plantasyon la done bon rézilta assé pou konvink anou k’in zour nou va vnir abou plante assé dori pou partisipe nout lotonomi alimantèr.

A ! Biensir, la pa plante in bon pé : par-la 3500m2, é ni koné ké pou konté i fodré plante kék milyé d’léktar. Nou lé loin, bien antandi, mé sa i vé pa dir i fo pa tienbo konte sak banna la fé. Dabor pars lo plantasyon lété bien zoli, é lo bann zépi assé vayan. Arzoute èk sa, sak banna i di sé k’zot i vé fé la somanss pou bann plantèr pou komanss in plantasyon dori.

Zot va dir amwin néna poin arien lé pli nouvo, lé pli révolisyonèr, pars in pé partou dann lo péi é dopi kék zané néna plantèr d’ri : d’apré sak mwin la antann, i i plante pa in bonpé mé i plante kant mèm . Mi pans in pé i doi dir, si i kontinyé fé konmsa la pa domin la vèye nou va ansiort anou dsi lo poinnvizé d’ri. La pa domin la vèye nou va produi lo 44 mil tone nou la bézoin shak ané.

Mézami, i pé s’fèr pou déssèrtin sa i vé dir in pé z’assosyasion l’apré fé joujoute avèk la plantasyon mé i fo kant mèm tienbo konte toute kalité mové kou bann plantèr la gagné é lé bien ké bann plantèr La Rényon i arkomanss lèv la tète é rofé zot kiltir… Mwin la fine dir kèl kalité kou d’jarnak bann plantèr d’ri la fine gagné mé zordi, ni avans diréksyon la rarté épi la péniri é la pa zordi, la pa domin nou sar dann l’obligasyon plante dori.

Ala pou kossa, mi pans bann zéspèryans i fé dopi kéktan lé itil, é v’amenn anou dsi in plantasyon konsékan, an kalité épi an kantité. Ni artrouv pli d’van.