Lo dimansh 7 juin nou té in paké d’moun sin lé-bwa blan pou di konm sa ni vé pa zot dé gro trou karièr la ba rant tansalé-zaviron-sin lé. Nou té kat mil, kat mil sin san in pé i di. Brèf navé dokwa fé tranm lo prézidan d’rézyon. I prétan li la gingn la tranblad kan li la koni lo nonm, la prèv zordi li arkil la d’si, li domann lo préfé rovoir lo tik-tak li larg tousala dann la min lo préfé ki dwa éstatié zordi. Li zèt lo patat shod dan la min lo préfé boudikont.

Li domann lo préfé sispann larété i otoriz ouvèr dot karyèr pou la nouvèl rout di litoral. Pou li sé in bon manièr pou shapé é lav son dé min. In nafèr i fo li konpran, domoun vilin nankor, domoun kouyon na pi. Domin banna i roganiz in gran rasanbloman létansalé kont la kayèr blwa blan touzour pou byin fé konprann a nou. Lé dé gro trou ni vé pa, la karyèr ni vé pa é la rout si la mèr osi ni vé pa.

Promié abor lo présidan i rokil tanmié, mé zordi ni wa pa koman li sa an sot a li. Lo problinm lé la touzour, tousala va sakaz nout lanvironman, va défigir nout natir, nout lagon i sar mor èk sa. Ni di prozé la rout di litoral lé sèr, néna ankor mwayin fé ot shoz é sirtou prozé la lé danzéré pou nou. Sépousa ni di, domin donn a nou randé-vou tansalé pou fé la fèt èk bann zartis, mé sirtou pou di lo présidan d’rézyon, li na pwin rézon. Kantanou ni tyinbo, ni larg pa !