Oté

Nou va oir, nou va oir, nou va oir sak nou va oir : in zistoir bèlj !

Justin / 23 févrié 2021

JPEG - 43.6 ko

I paré nou néna in lékip pou vanj kont la pandémi la pa ordinèr ditou. Alon di lé shoz konm i konvien : Banna i fé pète la kol é koman ! Zot i koné bann mézir banna la pran laba zilo, l é plizanpli sévèr é antansyon sak i déside pass par maye ! zot poi lé o fé. Zordi nou va anparl solman in zistoir bèlj. Donk listoir in ga i sort La Beljik, pou vni La Rényon port sokour son famiy, sansa son bèl famiy lé dann difikilté… In pé i di solman ni la vni oir son l’ot koté soulyé té i mank ali bonpé.

Mé oila, i fo in motif inpèryé. In motif inpèryé ? In ka d’vi épi d’mor, in grav problèm santé, in problem travaye. Anfin mi sava pa dir azot la list, I paré èl lé d’dan lo l’arété méssyé Préfé é kan méssyé lo préfé i arète, ébin la pa pou zoué kanète, mi pé assir azot… Po oir son moush La Rényon ? La pa in motif inpèryé, pétète pou li, mé pa pou lo l’arété préfèktoral. In késtyon d’ travaye ? Ala i n motif inpèryé vi k’lo ranplasman bann rényoné sé in motif konm i di. Donk lo ga l’amenn toute dokiman konm de koi li vien travaye shé nou. Mé oila, i paré lo dokiman té i fo.

In réfllèlksyon pèrsonèl : si néna tou lé zour dé mil pèrsone i sort La frans pou vni issi, é kè lo motif zot néna lé si inpèryé ké sa Kèl motif don ? Zot la fé mor zot momon dë foi ? Zot la trouv in maladi néna arienk in médsin shé nou i pé guérir sa ? Konm di morisien zot la po kabri lé an danzé ? An touléka, kan la tir la kourte paye-ti brin gran brin i di sa La Rényon-, la tonm dsi lo bèlj. Listoir i di pa si l’avé in sèl bèlj dann lavion mé lé konmsa pars lé konmsa, alon pa rod midi a katorzèr.

Dann dé bone radyo, ziska dann télé, i di déza bononm-la i sa gingn in kalité rèss trankil mi rakont pa zot : in l’amand i pé alé ziska 4500O éro, sépa konbien moi d’ prizon, é anpliské sa lanbarkman lo pli to possib péi d’rotour… Li pass an prosé, vite fé, bien fé pou li gingn 650 € l’amande, avèk anpliss in konfineman li va pass avèk son moush.

La nou la vi la ! La li la gouté ! Nou la visak nou la vi, ! In zistoir sinp bèlj mézami .