Mi souvyin nana in pé d’tan, par-la l’ané 1976, pétète in pti pé apré, bann loiyé la kaz, lo pri la monté vèy pa koman. Mi ansouvyin byin, l’èr-la nana dë zafèr la fé goumante bann pri : inn, bann militèr la sort Madagascar pou vni La Rényon, l’ote la komans pèy l’alokasyon lozman. L’armé té i pèy loiyé zyé fèrmé, é bann propriyétèr la goumante loiyé pars lokatèr té i gingn in bon moné l’alokasyon.
Moin lé sir, zot lé a d’mandé pou kossa mi rakonte zistoir la fine passé, dépassé, trépassé ? Pars souvan-défoi, sé dann lo passé ké ou i pé tir in bon l’informasyon pou zordi amène lé shoz konm k’i fo. In légzanp, l’ède pou pèy biyé l’aviyon. I pé di konmsa, bann konpagni va kontante azot lo pri zot i aplik é sak i voiyaz va gingn son l’ède, konmsa toulmoun sar kontan, épi dousman-dousman va arkomans rolèv lo pri bann biyé l’aviyon, an douss é san sokouss. Dousman-dousman, mé sirman ! Pars bann konpagni i sava pa invèstir, modèrnizé, byin roganizé, si zot profi lé assiré.
La prèv ? Nana aryink Air Austral la déside mète bann gro l’aviyon A380 déssi la lign La Rényon-la Frans, alé konm rotour. L’aviyon-la i konsonm moin lésans ké bann pli pti, an rézon, byinsir… donk lo pri bann biyé i doi béssé… i anparl lo shif 500 éro. Lé zot konpagni i bouz pa, i konte aryink déssi l’ède gouvèrnman, sansa la Réjyon... Konm di l’patoi kréol, « sé nouri lo vèr pou pik nout kèr ».

Justin