Sa sé in n’afèr lé pain nouvoté pou La Rényon épi son pèp rényoné, mé ossi pou bonpé pèp i koné pa vréman zot listoir. Listoir ? Pou mwin sé in matyèr fondamantal mé mi panss pa lédikassion nassyonal i trète sa vréman konm in matyèr d’fon… Ni koné lo kozman mi ansèrv souvan é k’i di konmsa : « si wi koné pa oussa wi sava, i fo wi koné o mwinss oussa wi sort ! ». Oussa mi sava sé nout demin konm lo domin la plipar bann pèp. Oussa mi sort sé nout yèr donk nout listoir.si ni koné pa oussa ni sort lé bien difissil konète poussa ni vé alé.

Si mi plonj in pé dann passé lo pèp rényoné, pétète mi tronp amwin, mé mwin néna dan lidé fitintan nout pèp téi koné pa vréman son listoir mèm pa par boute.L’avé lésklavaz La Rényon osinonsa l’avé mpwin ? L’avé langazism La Rényon sansa l’avé pwin ? La démokrassi lété k’i fonkssione bien shé nou sansa téi fonkssuyone pa bien ? La frode, l’oprèssion, la répréssion l’avé sa shé nou na pwin si lontan ksa osinonsa l’avé pwin ? Anfin mi panss zot i konpran pou mwin l’alikénassion sa sé kékshoz ni viv ansanm dopi lontan-ni viv mal mé ni viv kant mèm ansanm.

Alor kossa mi di an mwin-mèm ? mi di la vérité lé toultan dann in pti shomin tort é lo mansonz li trouv touzour, dann toutan son shomin galizé… Lé pa ké lo pèp i rofiz son listoir mé son listoir lé touzour galvodé alor sèryèzman sa in intéréss pa li d’antann dé shoz li rotrouv pa li d’dan. Pir li rotrouv pa li ditou : bann zésklav maron lété in bann bandi danzéré ? Oui sansa non. Bann zésklav té in bann paréssé ? Lotonomi sé lindépandanss ? Lé vré lé fo. Lo kréol sé in patoi sinpatik ? Néna dé grann janss k’i di sa. Lo kréol dan lékol, in danzé pou bann zanfan.

Mézami koman ni pé done la vérité son vré lète dann son konba ? Koman fèr an sort listoir, sate lé vré, pa sète lé galvodé i ariv a trouv son shomin galizé. Mi oi inn klé é sète klé pou linstan mi wa èl dann lédikassion popilèr in parre-feu kont lo mansonz roganizé.

A bon antandèr salu !

Justin