Konm kréol i di souvan dé foi, avann kozé tourn sète foi out lang dann out boush. Pou kosa i di sa ? Pars sa i done aou lo tan pou réflèshi, lo tan pou kalkilé. Si ou i koz tro vite, ou lé riskab dir in n’afèr lé pa vré, sansa lé domi-vré pars ou lé kapab konfonm la vérité vré avèk sak out l’imèr-bon l’imèr, mové l’imèr – i donn aou a konprann momandoné. Konbien foi moin mèm moin la pénn la vérité an roz pars moin la bien lové zour-la, sansa an gri fonsé pars moin la lèv pyé gosh konm i di.

Moin lé sir zot i pans moin l’apré tourn an ron. Alé oir non !.. Dan la somenn moin la trouv in bon dalon, dizon mèm in frèr ! é moin t’apré dir ali, an parmi bann politisien nana désèrtin na poin program, na poin in vré réfléksyon, é zot i pans azot an promyé olèrk pans nout péi. Ala ké li fé amoin in réflèksyon : li di amoin, sanm pou li, nout parti osi na poinn program. L’èr-la, mi di ali, alon artourn in pé an aryèr, dann tan Paul Vergès lété prézidan la réjyon. L’èr-la, mi di ali, si li na konésans lotonomi dann lénèrji, si li souvien lo projé tram train, si lotosifizans alimantèr sa i di ali kékshoz, si lé dé gran sèrvis dsi l’anvironemen épi dsi lo bann sèrvis proksimiyté, si sa i rapèl pa li in n’afèr. Aprésa, mi domann ali si bann projé kiltirèl dann tan i di ali in n’afèr avèk bann zarboutan nout kultur épi d’ot ankor, konm lo travay dsi la lang kréol La Rényon. Mi koné pa si vréman li la shanj son poinn vizé, mé moin lé li la réfléshi dsi la késtyonn program.

Astèr mi rovien dsi mon promyé kozman. Si nou l’alyans épi lo parti, si ni pass nout tan pou dir bann politik na poin program, bin va mète anou dann ta é va di, nou osi nou na poin projé, nou na poin program. Alé oir nou lé pa dann ta pars ni sobate pou tir nout péi dann fénoir ! Pou anshové m’a dir lé zot osi nana program : nou lé dakor konm pa, mé ni pé pa dir zot na poin vi k’tazantan zot lé dakor sanm nou si désèrtin poin. Mi arèt la mèm, mé mi invite mon bann kamarad a tourn sète foi zot lang dann zot boush avann kozé é nout bèf sora myé gardé.

NB In kozman pou la rout : « Malèr d’shien la pa bonèr d shat !  ». Kosa mi vé dir par la ? ni koné o shien èk lo shat sa i antann pa. Mi pans inn i vé solman i ariv l’ot in kanikrosh. Mé la pa pars lo shien la gingn in kanikrosh ké lo shat sora éré é vèrsi-vèrsa. Dizon lo shien i gingn in kou d’galé los ha i rir ! Mé talèr lo galé I arvien pou li. Donk fé travay zot koko, fé bouy zot matyèr griz é min lé sir zot bv atroub do koi pènn sak li sort di an-o la.