Eskiz amoin si mi répète la mèm shoz ké dabitid. Eskiz mon pardon ! Moin la touzour di, dann nout program, néna dé sort libérasyon : inn ni apèl la libérasyon sosyal é l’ot i apèl la libérasyon nout nasyon. Inn i va pa san l’ot zot va dir amoin…i va san dir-konm in pé i di-mé lé proférab di kant mèm.

Pou kosa mi di sa ?
Pars mi antan souvan dé foi demoun l’apré di : moin lé kont l’otonomi, mé moin lé pou légalité bann droi avèk La Frans (in pé va di la métropol, moin non sof si i di la métropol kolonyal…). Si ou lé kont l’otonomi, kont la résponsabilité pou bann rényoné ou lé pou lo sistèm néokolonyal konm li lé, pétète in pé rotoushé dann lo détaye mé pa plis.

Anplis ké sa :
Pou arzouté si ou lé kont l’otonomi sa i amenn aou a raprosh aou avèk lo dominèr kolonyal donk partaz tout son bann poinn vizé bann partizan la libérasyon nout péi épi la libérasyon nout sosyété i vé pa é san pour san. Sa la pa in l’invansyon d’mon par mé in léspèryans nout pèp la viv dann tout la péryod inn bann lété okipé pou lite kont nout domnn lotonomi.

Alor arète parl anou gosh avèk droit :
Pars néna in pé i prézant azot konm partizan patant la gosh, ankarté in parti l’ot koté la mèr, mé anparl pa zot la libérasyon nout nasyon, anparl pa zot non pli nout libérasyon kulturèl é pou nou sa sé in n’afèr ni pé pa pass dossi. Konbien i di zot lé d’gosh mè zot i lèv pa lo pti doi pou bann zidé fors nout parti kominis rényoné.
In sinp zafèr, in zafèr lojik konm rosantr anou dsi loséan indien, landroi ni lé, landroi ni viv, landroi ni doi fé nout l’avnir ébin sa i done in pé bouton. I fo dir souvan défoi zot lé an bénéfis dann nout sosyét é inégal é pou arien dann lo mond zot lé paré pou ronons zot privilèj.
La pan out ka, pars ni vé not doub libérasyon é si mi pé arzout in n’afèr : nout doub libérasyon plus !