Mé zami kan ni kalkil bien nout pozisyon dann loséan indien néna kékshoz lé vizib konm in né dann milyé la figir mé i sanbloré désèrtin i oi pa. Fransh vérité nou lé pa dsi kontinan éropéin. Nou lé pa non pli amaré avèk La Frans. Si mi di pa la vérité, pins amoin ! Si sé zot i oipa la vérité, pins azot !

Tou lé zour, shak zour, mi rogard la kart météo dsi mon lordinatèr é mi oi sak tout demoun i pé oir : an balaba néna pol sid, dsi nout gosh néna Madégaskar, kanal Mozanbik, mi gard ankor bannzil Komor, Sésèl épi in takon bann gran péi l’Afrik. Dsi la droite mi oi lil Rodrig, léstrèm oryan é dann nor néna in paké gran péi konm l’Ind , l’Iran, l’Indonézi. Mi arèss tèrla pars mon modékri la pa i n kart zéografi… In gran loséan dann milyé tousala é sa i apèl loséan indien.

Nou lé la, dann loséan indien. Nou lé pti mé nou lé la é sa sé in n’afèr, sanm pou moin, i fé parti nout lidantité.

Nou lé pa anshéné avèk La Frans, nou lé pa anmaré avèk l’Érop é mi domann amoin pou kosa ni fé pa plis in kont avèk in réalité konmsa. Pou kosa ni fé pa valoir nou lé dann l’Indianoséani. Pou kosa ni fé pa valoir nout l’avnir sé dann l’indianoséani ni doi fé ali… Nou lé pa dann bann gran zansanm bann péi La réjyon. Mèm la Coi ignor anou, pars La frans konm in zoizo i apèl lo koukou la parti ponn son zèf dann ni tourtrèl.

Astèr mi rogard nout bann voizin-voizin pré-kisoi par la zéografi, kisoi par nout listoir, kisoi par nout kiltir élèrla mi koz avèk nout bann voizin. Lil Moris, nou lé bien kouzin, nou lé bien famiy ébin alor pou kosa zot lé dakor pou ké La Frans i bord anou par rapor avèk zot ? Mi domann mèm shoz avèk Sésèl, Madégaskar, péi Komor épi mi di avèk zot :
Pou kosa zot i révolt pa kan i mète zot frèr épi zot kouzin an déor. Zot lé a tab é nou i done anou in gamèl konm i done lo shien in gamèl pou manz an déor la kizine. Eskiz amoin mé la famiy, sa lé sakré sa ! La solidarité familyal sa lé sakré sa ! Biensir néna linz sal rantre nou mé linz sal i lav rant famiy sa !

Lé vré nou la pa in l’éta pou lo bann rézon zot i koné, mé sa i anpèsh pa nou d’ète in pèp loséan indien é sa i doizète inportan pou zot konm pou nou. Mèm si nou lé pa gran, si nou lé pa rish, si n ou lé pa friké nou lé famiy.. . Mi pans pa zot lé paré pou vann azot lo pli ofran. Rant nou, sa i fé pa sa é mi pans pa zot va fé mé nout droi, nout droi asiz a tab avèk nout bann frèr épi nout bann kouzin ? Nou la pa pèrd nout droi kanmèm la di ! Nout droi diskite problèm rant voizin, nou la pa pèrd !