Nana in pé péi, demoun i di zot lé dévlopé pars zot na in for dévlopman imin bazé dési in for dévlopman l’ékonomi. Nana d’ot, demoun i di zot lé sou-dévlopé, pars zot na in fèb dévlopman l’ékonomi épi in fèb dévlopman imin. Rant lé dé, nana in pé toutsort dévlopman imin, épi tout sort dévlopman l’ékonomi. I pé an avoir in for dévlopman imin dann in péi na poin in for dévlopman l’ékonomi. In légzanp, si ni anparl La Rényon, ni pé dir nana in bon dévlopman imin, mé na poin in for dévlopman l’ékonomi.

Désèrtin i apèl sa in kroisans san dévlopman. D’ot i anparl in péi an kriz striktirèl, mèm si pandan in koup de tan... La Rényon lété an kroisans, mèm si la kriz striktirèl lété la. Lo péi l’avé touzour in gran kantité shomèr, in gran kantité pov, in kantité z’ilétré, in mank la kaz pou bann famiy... si tèlman demoun té i di nou té an kriz mèm si nout PIB té i kontinyé goumanté l’ané apré l’ané. Dépi l’ané 2009, nout péi la rant an résésyon.

L’èr-la, ni pé dir, sa i ariv anou pars nou la pankor nyabou fèr lo dévlopman nout l’ékonomi. É sa lé bien vré. Pars si nou l’avé gingn trap nout dévlopman, dépi o moin 1946, nou noré nyabou an avoir in bon dévlopman nout l’ékonomi konm soubasman in bon dévlopman imin. Pars, lé vré, si nou na poin in l’ékonomi dévlopé, in pé lé riskab dir, nou la pa fé ali par nou-mèm. In pé lé riskab dir, dan sé kondisyon, nou lé asisté.

Poitan, la pa sak ni vé ! Ni vé pa ète asisté ! Sak ni vé, sé dévlop nout l’ékonomi, é baz la-dsi pou fors dési nout dévlopman imin, an aplikan nout droi, an avoir in péi dévlopé. Pars sa, sanm pou moin, sa in droi natirèl bann pèp !

Justin