Mi koné in kaz nana kat poto, épi tou lé kat i soutien lo kaz. Anplis ké sa, bann poto i azi inn déssi l’ot é rantre zot pou rann mon batiman solid. Nout dévlopman nana galman kat séktèr : inn sé lékonomi, l’ot sé le sosial, lé dé zot lanvironman épi la kiltir. Anplis ké sa nana, la fason inn i azi déssi l’ot é rantre zot pou rann nout dévlopman dirab.
Si ni vé réissir sak i apèl lil d’excellence, i fo dann shak domèn nana demoun briyan, nana bann kador, bann zarboutan sa lé bien néséssèr pou nou é pou nout péi... Tout domèn i kont, napoin inn i kont pou la po patate.
Zordi, nou nana in zarboutan i sort alé. Tout sak i intérès in pé la kultur té i koné ali, téi koné son kapab, son gouté, son gou d’sèl, épi la manièr li té i plonz dann son rasine, manièr li té i plonz dan nout rasine avèk son kozé, avèk son shanté, son manièr zoué la mizik, épi son fason bouzé... mèm si li té apré rod in n’afèr introuvab. Mi pans li té konmsa !
Arnaud Dormeuil, lo mizisien, lo komédien, in vré lartist i sort alé. Bonèr, tro bonèr pétète, lèr li té i sava fé montr anou tout son kapasité. Kan in zartis i mor jèn, sak i rès déyèr i kalkil kossa li nora fé dann bout la vi li la manké, bien sir san zamé trouv in répons pou késtyon-la...
Mi mazine, pétète landroi li la parti, li la kroiz Gérard Philippe, Guillaume Depardieu, ou sansa Jimmy Hendrix, mor galman tro bonèr. Touléka, mi pans nout “géant petit homme” sar pa ditou dépéïzé an parmi bann moun lavé in si gran kapasité.

Justin