Pé s’fèr in pé dmoun i trouv sa in drol lidé dir sa kan nana in zéléksion pou mèt anlèr in prézidan la répïblik pou sinq an. Pé s’fèr na in pë i di akoz pa fèr konm demoun i fé an Franss : shoizi in kandida, vot pou lï, apré lé bon pou sa mèm.

Solman, nou pë dir sak nou di toultan : la sitïassion nout péï la pa parèy la sitiassion la Franss. Nou pé pa pèrmèt anou fé konm si nou té in bann zabitan in réjion ou sansa in départman fransé, ninport a kèl.

Lé ga ! lé vré vréman, issi la pa konm la-ba. Issi nana kat san mil pèrsone nana la CMU, donkalor lé pov mèm. Si la-ba té konm issi, noré trant milion d’moun noré bénéfisié la CMU. Donkalor, noré trant milion moun pov.

Zot i konpran pou kossa nou panss, nou panss épi nou arpanss nout péï toultan. Ala pou kossa, sof pou kissa nou va voté kan v’ariv lo jour lo votaj, nou va vot pou lo bann zintéré La Rénion. Ala pou kossa nou di, nout kandida sé La Rénion.

Justin