Alon mazine in sosiété oussa toute demoun i konsèrv tèl ke sé, sak zot i amèn késtionn lang, kiltir, filozofi, rolizion... ousak bann i ariv an promyé, i partaz an frèr tout la kiltir zot nana avèk sak i ariv apré. Si laté konm sa, La Rénion narté pliské rish dsi la késtionn kiltir. Solman, la pa konm sa la éspassé !...

Alon mazine, in gran pilon, ousak i mète tout sak toulmoun i aport, épi i mélanz bien ansanm : inn i fonn avèk l’ot, épi inn i fonn dan l’ot, san batay, san traka.... Noré été in sosiété larmoni, la dousèr, la pé. Malérèzman, sa la pa marsh konmsa ! Akoz dépi lo komansman nout listoir, lavé dominèr épi dominé : mètr avèk zésklav, zangazist avèk zangazé , kolonialist épi kolonizé. Zordi ankor, nana si tèlman linégalité !

Alor, la kiltir la-dan ? Sé dan la lïtt, èl lé né, akoz bann dominé la pa lès kraz azot san rézisté, épi bann dominèr la pa gingn rézon toultan, pou tout zafèr. Azout ankor, lo mayaz demoun tout kondission ! Sa la donn nout séga, nout maloya, nout lang, nout kuizine, nout mantalité épi nout bann valèr, nout lamour pou l’égalité épi pou la libèrté.
Nout konba èk nout kiltir lé mayé inn dan l’ot, lé dé i diriz inn-a-l’ot.

Justin