Matant Zélida la ékrir Justin :
Mon shèr nové, mon spès salté, rouj-de-fon dopi lo létèrnité, si mi konpran bien, zot bann rouj-de-fon zot i pran azot pou lo bann shanpyon la kiltir rényonèz. Si i suiv azot in pé, zot lé riskab fé kroir lo moun sé zot la invant osinonsa dékouvèr la késtyonn la kiltir rényonèz. Poitan, m’a dir azot franshman, an parmi bann kiltirèl néna d’moun lé pa zantiy-zantiy avèk zot : in pé i diré mèm, si lo lidantité rényonèz la pa avans konm k’i fo-pou zot-sé par raport Parti kominis la zoué in rol ni pé batiz ali konm loportiniss : in manyèr d’dir zot la koup dé koté. Tok ! Pran sa pou toi !

Justin la fé pou répons :
Mon vyé matant k’i koz toultan la boush rouvèr, sak ou l’apré di i étone pa moin d’ou mé domaz na poin in listoir nout parti épi la kiltir pars si l’avé nou noré vi sak ou la mark an-o la i tienbo pa d’bout épi ni véré dsi bann gran dosyé la kiltir si nou lété oportinis pou vréman.
Oportinis dsi lo maloya ? Mansonz i done flèr solman, la vérité i done lo frui. Oportinis dsi lo kréol rényoné dann lékol ? Lé bien domaz, la pa nout parti lo shèf pou lédikasyon nasyonal isi, sansa ni soré ! Oportinis dsi la késtyon lésklavaz ? Sète-la non, lès mansonz la par koté. Oportinis par raport l’angazis ? Sète-la mi kroi pa. Nou la zoué lo maloya kont lo séga ? Sa i di mé i prouv pa. Kont lo moring ? Alé oir lo gran ron moring Sint-Sizané é lo bann marmaye i zoué sa é zot va oir si bann kominis la mète sa d’koté. Témoignages sé lo sèl zournal néna dopi dé zané é dé zané son kronik an kréol rényoné.
Mi arète la, mé mi invite azot pou réfléshi in pé dsi so poinnvizé-la : si zordi nout kréol rényoné néna in gran favèr dann nout kiltir, dann konvèrsasyon rant rényoné, dann nout prodiksyon kiltirèl, zot i pans vréman nout parti lé pou arien la dan. Zot i pans vréman nout parti néna soisantan zordi la pa fé arien pou sa ? Sak i pans sa, pou moin i fo li réviz son zizman é si li vé pa konm i di, li pé tir in fèye.