Oté

Nout parti la pa mor : an kontrèr li rofé !

Justin / 23 mé 2018

JPEG - 43.6 ko

Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, i paré z’ot parti la réini pou fé la fète bann yvyé militan. Z’ot zarboutan, d’apré sak zot i di. La pa ké moin lé kont in sélébrasyon pou bann vyé ! La pa ké mi trouv sa initil ! Mé, moin pèrsonèl, mi oi pa kosa k’i ansèrv sirtou kan la poin jenn pou pran la rolèv… épi zarboutan sa lé bien. Sa lé bien kan ou néna poto pou tienbo la kaz dobout é pi lo ti par dsl m ési ou na poin l’inn é l’ot, éskiz amoin, mé mi oi pa kosa zarboutan i ansèrv. Tok ! Pran sa pou toué !

Justin la fé pou répons :

Mon vyé matant k’i koz toultan la boush rouvèr, sak ou i di la pa fé pou étone amoin pars ou i roprann in pé tout bann kozman mi antann dopi in bonpé d’zané, bann kozman i di parti kominis lé mor. Pli pir néna in pé i di la pa bézoin tir dsi l’anbilans.
An touléka, si ni fé travaye nout tèt ala sak ni pé dir :
In parti i pé z’ète mor si li na pi d’zidé, mé nout parti néna d’zidé é a komansé tout sak Paul Vergès la mète dann son bann liv. In parti i pé z’ète mor si li néna zidé mé si son bann zidé i intérès pi pèrsone é sa la pa vré. In légzanp ? Lo lidé l’lotonomi énèrzétik, sète la sékirité alimantèr, sète nout dévlopman sète ankor la solidarité avèk bann péi l’oséan indien, avèk la Palestine… I pé pa dir sa intérès pi pèrsone mèm i pé di lo kontrèr.
Li pé z’ète mor si tazantan li ranplas pa son poto é mi pé dir aou la pa ditou sak i éspas dann nout parti ; son tol i pé pouri ziskatan k’i anpar pi arien, ébin la pa sa ditou. Li rofé son poto, li romète la tol nèv é ala ké li lé roparti.
Li pé zète mor si d’ot parti i aport bann zidé nouvèl é si bann zidé nouvèl i pous an déor son bann zidé ali é la pa lo ka ditou, sé mèm lo kontrèr. Li pé z’ète mor si d’ot i pran son bann zidé é li lé pi propriyétèr ké d’in kokiye vide é la pa sa k’i éspas pou vréman.
Tok ! Pran sa pou ou !