Asiz déssi in rosh bordaz la rivièr, mi rogard delo koulé. La rivièr la fine fé son li, na poin arien pou kal aèl. Delo i koul mèm a kontinié... Mé agard bien ! Suiv bann ti bout fèy : inn i koul dann fon apré i arsort, l’ot i bit-bit déssi lo bor, d’ot ankor, sé pa pou kossa, i débouz pa, in n’ot i fish ann sandan konm in tèt fol. La rivièr nana ossi son bann kouran kontrèr, mèm si sa i anpèsh pa li suiv son shemin, sort la montagn pou alé la mèr : son linité épi son divèrsité !
Alor, mi di dann mon kèr : saspé in pèp galman lé konm sa. Tout lé pa toultan dakor, la poin lo mèm lintéré, i pans pa mèm shoz, la poin in sèl fason oir lé shoz. Épi sa lé normal. In pèp ossi nana son linité é son divèrsité : son bann kouran kontrèr i anpèsh pa li avansé, alé pli loin pou bien roganiz la vi dmoun...
Mi antan mésié Bayrou, in gran politik i sort la France, i di konm sa bann politik i pé travay ansanm mèm si zot lé pa dann mèm parti. Sa in bon kozman épi sa sré mèm premié règleman pou nou, bann Rénioné : rasanm tout demoun bone volonté pou travay ansanm, épi fé avans toulmoun.
Déssi la késtionn Parti, déssi la késtionn Létikèt, in sèl parti lé bon pou nou, in sèl létikèt lé bon pou nou, vik nou nana si tan tèlman pou fèr ansanm. Nout parti, La Rénion, nout létikèt, La Rénion ossi. Pa in Rénion fèrmé déssi èl mèm, mé rouvèr... oui, rouvèr konm k’i fo.

Justin