Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, mi di aou franshman, dimansh moin la pans aou bien. Kansa ? Kan moin téi oi tousa d’moun foulé dovan biro d’votaz. Moin la pans out ti pé d’san téi bouy pars, ou i koné bien, lo vote té pou dézign lo kandida la droite, pou z’éléksyon prézidan la Répiblik. Sak i dové fé mal out tété-konm kréol i di-sé ké la pèrsone sar dézigné, sé èl ké sar lo fitir prézidan-in prézidann droit oiyo ! Pou moin, sa i bote amoin pou vréman ! Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, mi trouv kant mèm bizar sé amoin ou i ékri in n’afèr konmsa. Pou kosa mi di aou sa ? Pars oplis i sava, oplis mi égzamine lo péizaz politik la Frans, oplis moin na difikilté pou klas amoin la-dan. Dizon plito mi rofiz rant dann so klasman-la.

Pou kosa ? Pars, dopi moin la gingn mon konésans, moin nana in gran sousi sé d’ oir mon péi trap son dévlopman pou aranz la vi la totalité son bann z’abitan dann la diré. Kan mi di « mon péi » mi pans La Rényon. L’èr-la mi romark ni lo droite fransèz, ni lo gosh fransèz la sousyé pou vréman dévlop mon péi konm k’i fo.

Donk, sanm pou moin, bann parti la gosh konm bann parti la droit fransèz nana in poinn-vizé sé La frans bazé a plis dis mil kilomète dé nou avèk son bann z’abitan-in poinn vizé pou l’égzagone. Alé oir lo poinn vizé-la myène-konm sète mon parti sé La Rényon épi bann rényoné, donk in poinn vizé rényoné.

NB - Ala pou kosa, zordi, okin primèr i aral amoin é mi pans i pé sort arienk mové z’afèr pou nou koméla. Pétète domin, si par ébzanp, in kandida, dann son program noré in plan pou détrui lo sistèm néo-kolonyal k’i anklav anou si tan tèlman.