Zot i pans bann minis sé in bann kador dan la konésans zot ? Zot i kroi sé in bann pui d’syans ? Akout in pé sa !

Sékou Touré sa la pa in malien sa !
Moin la lir in nouvèl in pé étonan. I paré, méssyé Hortefeux la parti fé in voiyaz ofisyèl dann in péi l’Afrik i apèl le Mali. Kan li l’ariv la-ba, li la lir son diskour… Momandoné, li la parl in gran pèrsonaz lo péi, épi li la nonm lo nom Sékou Touré. Aÿe ! Aÿe ! Aÿe ! Mank de po, Sékou Touré té in guinéin, té pa in malien...

Akoz i gnor toute nout bann zansète ?
Mi pans i vo myé konète listoir lo péi ou i rann vizite, sirtou si ou lé minis. Lo myé sé d’aprann sa lékol. Malérèzman in pé lé boushé, zot i vé pa d’sa. In légzanp ? Gouvèrnman i sorte rofé lo program listoir pou bann marmay i rante dann klas sinkyèm. Dann program-la, la mète in shapite déssi l’istoir l’Afrique. Inkroiyab ! Sa i mal-kontante in pé d’moun, é zot i di lo minis l’Édikasyon : « Tir sa dann liv-la » !

Nou lé shoké d’sa !
Nou Rényoné, in n’afèr konmsa i shok anou. Ni koné nou in pèp zanbrokal é nou lé fyèr d’sa. Myé, ni vé k’i anparl lo péi toute nout z’ansète. Lé normal sa !Lé normal bann marmay i aprann konète nout zansète, toute nout zansète !Nout rasine, toute nout rasine ?

Justin