Dann nout l’istoir lé pa rar nana dé kou d’manké. In légzanp ? L’ésklavaz la aboli dé foi, inn foi l’ané 1792, inn foi l’ané 1848. L’égalité la désid an dé foi : inn foi l’ané 1946, in n’ot foi karant z’ané apré. Parl pi nout dévlopman, sa la pass dovan nout bout de né, pa arienk an in foi. Dèrnyé foi mi rapèl l’été l’ané 2010, l’ané bann partizan lo dévlopman la pèrd zéléksyon réjyonal.

Mi pans zot i doi rapèl azot dé sa. Pou kosa ? Pars la pas in bonpé d’tan nout lékonomi la dévlopé : san mil shof l’o solèr li ! Tout sort kalité projé la komans amontr z’ot bout lo né ! L’otonomi dann l’énèrji la komans manifésté ! L’otosifizans alimantèr la mète an marsh ! Lo péi la modèrnizé ! La anparl lo train, la fé la rout tamarin, la fé lisé an kantité ! Mèm bann gran lékol la komans vni isi !.. Mi di pa pliské sa, mé l’avé dann l’èr konm in kouran la modèrnité, in komansman marsh an avan pou nout dévlopman. So foi isi, l’avé poin pou shapé, la Rényon té i sar dévlopé pou vréman.

Élas Ménélas, mon kèr lé an filas ! Ala pa ké ni artourn an aryèr ! Ala pa ké ni éstop in bann bon projé Pol Vergès la mète an rout. Fini avèk lo tram-train, fini avèk l’énèrzi volkan ! Fini avèl l’énèrzi la mèr ! I di i sava dévlop lo touris, oki d’mimite ! I di i sava mète dé mil kar dsi la rout, zéro kalbas ! I koz dsi l’otonomi énèrzétik ! Mé i koz soloman. I koz dsi l’énèrzi prop, Mé i koz soloman. Pou konplète nout malèr, ala ké madam Bello, in gran dirizan nout parti i bril la paye avèk nou épi i afayi nout parti, son kapasité pou rézisté é i ral nout pèp an aryèr.

Zordi zékléksyon ala pa k’èl i fé, pou dézyèm tour, fas-a-fas avèk Didier Robert . Pou kosa ? Pou fé la mèm shoz ké l’ot daoir ! Pa pou romète dsi lé raye nout révolisyon obliyé. Sète zot la kas lo rin l’ané 2010.