Dopi yèr l’imanité i viv an krédi é la pa zordi la komansé. Néna kèk é kèk zané nou lé konmsa. Konm i di, l’imanité i manj o pyé. Dann sèe moi, l’imanité la konsome pou douze é sa sé in n’afèr la pa bon ditou.

Kisa la manj konmsa ? Biensir la pa lo nèf san milyonn moun i soufèr la fain. La pa non pli tout bann zanfan i soufèr avèk la mizèr. Bin kisa alor ? Sé tout sak i dépans san konté, i manz tan k’sé asé, i gaspiy poisson dan la mèr, i fé pa lo rosiklaj poitanlé bien nésésèr. Tout sak i manz la vyann pli k’i anfo. Arzout èk sa bann z ‘éta rish i gaspiy bann rishès natirèl pou z’ot prop trinn vi. E la plipar d’tan zot la parti ship sa shé lé zot.

Mé pétète zot i pans i pé paf é otroman ksa. Pétète zot i pans lo gaspiyaz lé pa posib s’an pasé. Pétète zot i pans néna oin lo moiyin pou fé otroman… Si zot i pans ko nmsa, l’èr-la l’imanité va komans viv a krédi pli bonèr ziska ké v’ariv lo tan lo mond sar dann lo bézoin. Pa solman bann péi épi bann moun pov, mé bann péi épi bann moun ni apèl rish zordi.

Koman lé shoz va spasé kan nou va konsome dann in n’ané, dé, épi troi, épi kat foi lo bann rosours la tèr ? Nou v’alé dann l’éspas pou rode sak va mank anou isi ? An tou lé ka la pa pou koméla pars léspas l é gran é i sava pa ko nmsa dann bann planète épi bann zétoil dann tréfon l’éspas .

In solisyon : shanj manyèr viv, shanj manyèr travaye, shanj voiyajé, donk shanj manyèr dann tout z’afèr. Mé kisa i la fé ké ni viv konm ni viv, ké ni konsome konm ni konsome, kèl sistème i domine lo mond d’apré zot ? Moin mi oi in gran résponsab sé lo sistèm kapitalis é si i shanj pa sa, mi oi pa koman ni sava règ nout konsomasyon dsi nout rishès. Aséréman, la pa dann sistèm kapitalis, nou va trouv nout salu. Fransh vérité !