M’a dir azot in n’afèr ; mi koné pa si zot i pans konm moin. Pétète mi rèv la réalté san viv aèl po vréman. Pétète konm pétète pa !… zot va di ankor ousa ousa son réfléksyon i amene boug-la ? akoz li la pou rode l’inposib akoz ? Pars konm di lo kont, inposib la pa kréol.

Ala mon promyé réfléksion : pou moin nout poin for posib La Rényon sé nout matyèr griz. Nou na lékol, nou na kolèj, nou na lisé, in linivèrsité k’i domann arienk pou amélyoré, é lékol l’injényèr k’i domann arienk in bon l’éfor, in lékol l’administrasion i rode arienk pou énète… Tousala, pou moin, konm pou d’ote i apèl l’indistri la konésans. Pou moin sa sé in bann bon zoutiy pou dékoloniz nout péi, pou dézanklav nout pèp, pou amen anou pli o, pli loin.

Pou kosa mi di sa ? Nou sé in poin dann l’oséan. Avèk nout milyon zabitan nou lé an danzé par raport d’ot péi apré dévlopé. Par raport kisa ? Madégascar avèk san tardé sinkant milyonn moun, L’afrik dé l’èst Mozanbik, Kénya, Tanganyka é pous in pé pli ba L’Afrik di sid. Kosa i pé rann anou pli sèrvis ké dévlop nout matyèr griz, é dann kèl landroi nou lé myé ké landroi ni lé pou dévlop nout lindistri la konésans.

In késtyonn vi ! in késtyonn mor ! Sa sé pou moin konm in guèr pou nout sirvi an tan ké pèp rényoné !