Mardi soir, l’avé in sobatkoz Sin-Zil, in kopozante l’Alyans té i roganiz. Té byin intéréssan, vi k’té i porte déssi la késtyonn dévlopman La Rényon... Momandoné, prézidan la Réjyon la anparl nout soi-dizan l’izolman dann l’oséan indyin. Sa in kozman i rovyin souvan ! In pé i di : « La Frans lé tro loin, l’Erop lé tro loin, bann péi dan nout réjyon i vo mèm pa la pène di z’ot nom »... étsétéri, ètsétéra, la ké lo ra.
L’èr-la té i arvyin dan mon tète toute bann z’imaz dann tan lontan : inn, déssi son zournal, té i mète nout péi kosté sanm La Corse, l’ote té i nonm "parti sosyalis ile de La Réunion" pars noré korsh son plume pou di solman Parti Sosyalis La Rényon ou sansa Rényoné… "nout péi", té i falé pa di, nout kultur, sa lété bani, nout listoir… ki fouti listoir ? Bon ! lo tan la passé, lé déryèr nou, sof pou in bann irédiktib goloi… mé solman, sa la fé déga dann nout tète. Lé vré, Ziskakan té i shante « nout péi bato fou »* — pars l’avé galman bann rézistan, mé pou fé déga l’assimilasyon la fé kant mèm.
Zordi, nana gran-gran péi pa tro loinn nou : Lafrik di Sid, L’inn, La Shine... zétoil i briy plizanpli. Pézidan Sarkozy i anparl dévlopman andojène. Air Austral i tras dan lé z’èr. Domin nou nora in konpagni bato, nou nora l’otonomi dann l’énèrzi… tram-train va roulé, demoun va vni oir nout zoli Mézon dé sivilizasyon… nout dévlopman lé an marsh. Tardra vyindra, nout zétoil va briyé. Kissa va koz ankor, la boush rouvèr, déssi nout soi-dizan l’izolman ?

 Justin