Gouvèrnèr Vauboulon, sa lété in léstré-sa : mové vèy pa koman, tortïrèr dmoun, volèr fanm demoun, mèm si li té in gouvèrnèr dann tan La Rénion téi apèl l’il Bourbon.

In légzanp : navé in boug té i apèl Brocus. Sa té in z’ansien pirat, lavé larzan an gaspiy, mé té pa in rézon pou fé alï la mizèr konmsa.
Akoz li la parti la shass kan lété défandï, la obliz alï pèy in bèl l’amand : sis koshon, uit mal dind, dë san liv de ri, trant liv larzan. La mèt lë boug la jol, apré, Vauboulon, la dor avèk son fanm. In pé dtan, apré, li la robissé, pou in n’ot rézon. Së kou issi, Brocus lavé donn plan zognon bann noir la parti maron.

In zour, ziska, li la fé arèt sonn la klosh légliz akoz lï lavé pa donn lë droi fé dézord. La, li lavé pass la born. Lë 21 novanm 1690, lë bann moun, lë prèt an tèt, la kapaye alï, an plin dann milié la mèss épï la mèt alï la jol avèk son bann nèrvi. Banna lé mor dan la jol.
Bann révolté ossi la guinye zot siro apré : la mèt azot pou ramé dann bann galèr, épï la plïpar lé mor, sof lë prèt, père Hyacinthe. Banna la lèss alï retourn dann son kouvan.

Franshman vérité, nout bann z’ansèt té pa zanfan tann !

Justin