M’a dir azot in n’afèr : mi pans i fo kroir bann mirak. Akoz sa ? Konm zot i koné, Zé-dé-zil la komansé somenn dèrnyèr dann péi Sésèl. Akoz in mirak ? Pars, figir azot, l’ané 2008 épi l’ané 2009, Sésèl lété aznou : la kriz finansyèr, la kriz dann tourism, la kriz dann la pèsh lété apré pèz lo péi atèr. Dizon lété kaziman an fayite é té blizé kriy o-sokour lo FMI, l’Inyon éropéène épi la bank l’Afrik é li té blizé fé in bann réform li noré pi s’an-passé, pars dann touléka, sé lo pèp k’i soufèr d’sa.

Koman-koman, lo péi la fé son réform, la shanj in pé son politik é l’ané 2010, Sésèl té fine rolèv la tète. Si zot i kroi pa, alé rogard déssi Internet : l’ané 2010, tourism té fine ardémaré, la pèsh galman mèm si bann pirate i an-nuy in pé, lo roupie séséloiz té fine arpran favèr é lo péi la mèm pèrmète ali fé dé shoz pou la santé, é pou lo sosyal. In légzanp pou in bonpé péi ! Donk lété pa étonan lo prézidan le Répiblik Sésèl, dann son diskour, pou la rouvèrtir lo zé, la félisite tout sak la mète ansanm pou roganizé. In zé la koute karant-troi milyon roupi séséloiz. In roupi, sa i vo kinz santime l’ero par-la, donk total, sa i fé par-la sis milyon sink san mil l’éro.

Mé sak lé orizinal, la pa l’État la fé tout lo dépans. Bann sosyété privé la mète zot kot-par. Bann patriyot séséloi la mète sak zot té i gingn. Marmay lékol la fé konmm in gran kèrmès, la vann gato pou ramas larzan pti pyès par pti pyès... L’État, la done in lotisman sosyal pou bann délégasyon arète dédan. Mi di azot sa in pé an-gro, konm moin la antann, mé i fo bate la min pou banna, i fo bate la min pou nout bann kouzin pars si sak zot la fé la pa in mirak, é bin sa i rosanm drolman. L’èr-la, kan lo prézidan i kalkil lo pèp sésèl la fé mirak, mi pans li la rézon, é li pé di, san vantardri : « Nout zil, nout zwé » (nout bannzil, nout bann zé !).

Justin