Kan nou téi mazine noute domin, nou téi oi anou oto-sifizan pou noute manzé, avèk in flote btao d’pèsh épi bande lizine téi tourn in pé partou ? An pliss konm nou l’avé lanbission nou téi oi nou dévlopé dsi lo poinnvizé noute lékonomi, dsi lo poinnvizé sosyal, kiltirèl é tousala dann in nouvo kade institisyonèl nou téi apèl lotonomi.

Zordi ni rogarde in pé lé zalantour é shak foi ni rogarde, ni romark La Rényon koméla la pa ditou parèye La Rényon dann tan : bonpé zafèr la shanjé lé vré, mé lété pa konmsa nou téi oi noute domin.

Fransh vérité nou téi oi noute domin dévlopé pou lékonomi, pou la kiltire, pou la santé, pou la roshèrch, pou lo transpor ékoatéra, é koatéra. Sirtou in n’afèr : nou téi oi La Rényon lib é si mi tronpe pa sa lété in slogan pou nou.-Dann tan zénéral De gaulle téi di « Viv lo kébèk lib ! », akoze pa nou ?

Zordi mèm si ni aprouv in bonpé zafèr, sak ni oi i kontante pa noud si lo fon.. Alor ni rève noute zanfan va konète in Rényon méyèr, é ni arsorte noute bande zidé mi panss lé touzour valab. Alor mézami, alon arkomanss arparl de sa é konm i di : ke san flère i épanoui épi san lékol i rivalize, épi viv La Rényon lib.