Insi mwin ! Mwin té apré ékoute télé é toudinkou mwin la antande néna bonpé kréol — o moinss 30 % d’apré sak té apré kozé — i parl ankor kréol rényoné. In pé pliss mi pass l’ote koté pars si néna arienk 30 % rantre nou i koz ankor kréol, nou lé fouti. Dann dizan va rèst arienk 20, épizapré 10 insi d’ suite, insid’suite ziska ké arienk bande savan — pétète franssé — va parl ankor nout langkréol rényoné.

L’èrla mwin la parti rogarde in pé dsi toute bande zankète lopinyon mwin té pé trouvé. Mwin la parti four mon né in pé partou, ziska in lartik la pass dann zoinal Les Echos é li té anparl lankète ministère la kiltir franssé i fé in pé partou é promyé foi i fé dann bande péi l’outremèr. Mi pé dir azot mwin la roviv pars mwin la lir 81 % demoune La Rényon i koz kréol tou lé zour.

Aprésa mwin la vi in n’ote éstatistik téi di 53 % d’moune shé nou i koz arienk kréol rényoné. Bon nouvèl lézami ! Sansa mové nouvèl ? Mi doi dir sa la pa in kékshoz pou jène amwin sof a parl la panik dann lédikassion nassional franssé. Kossa, dopi lontan toute zanfan kréol i sava lékol é arivé laz kinzan néna ankor 53 % d’moune i koz arienk kréol é i gingn pa koz franssé. Sa inlansègnman an fayite sa !

Astèr va di néna 38 % d’moune pliss kinzan i pé z’ète konsidéré konm biling. Sa i fé pa bonpé pars lo franssé d’apré sak mi oi lé mal amontré. I fo dir lansègnman franssé an zénéral ziska zordi la pa in réissite. I étoneré pa mwin ké dann bande péi OCDE lansègnman franssé sré ankor in kou dèrnyé la ké.

Lé konsékanss d’in n’afèr konmsa lé pa bon ditou pou nou mé pou zordi nou v’arète dsu bande shif i amontr noute lang kréol rényoné i tienbo séktèr é sa sré plito in bon nouvèl pou nou, in bon kado d’noël an atandan ké lansègnman dann la répiblik i amélyor in kou. Tardra viendra !

A bon antandèr salu !

Justin