Pou kèl rézon ? Mi pans sirtou pars la lang la pwin lo zo é lé pli fassil koz la boush rouvèr plito ké fé travaye son tète é la vérité sé kékshoz ki shanj avèk lo tan, antouléka avèk lo progré l’imanité i fé tazantan dann tèl oubien tèl prodikssyon.

Mi panss mwin la fine di avèk la métode lo père Laulanié dsu la késtyon d’lo ri « SRI » — li la sirtou travaye Madégaskar — lo randman la plantassion do ri la fine goumante bokou é lo tan lé bien loin karo do ri téi done solman inn tone l’éktar... Déssèrtènn foi mwin té i sava rode dann péi l’Afrik koman téi mélanz la farine do blé épi la farine sorgho pou fé do pin. Aprésa mwin la vi koman dann déssèrtin péi l’Afrik i fé do pin avèk la farine magnok.

Pou ariv dsu lo ladaptassyon la somanss lo blé avèk bande klima tropikal é sa lé inportan pou nou k’i ansèrv ziska 12 ziska 13000 tone jo blé shak ané. In zour mwin la anparl ravaze : sonz, kanbar, magnoc, patate, patate shoushou, épi toute sorte kalité léguime.

Bien antandi i fodré oir galman la fasson pou nou produi manzé pou noute zanimo koshon, bèf, kabri, volaye é konpagni épi toute kalité transformassion bande matyèr promyèr.

Mézami mwin pèrsonèl mi trape par issi épi par laba bande ransègnman lé itil pou trape nout lotosifizans alimantèr, mé sak lé sir sé ké la formassion bande prodiktèr, épi bande nouvèl métode prodikssyon (lé pa non pli a néglizé). Sak lé sir sé ki fé pa toute zafèr avèk la krash mé avèk la métode épi la roganizassyon an méfyan bande shanjman klimatik.

Sak mi di, mézami, sa i roflète mon lékspèryans pèrsonèl épi toute linformassyon mi trouv issi é la. Mé ni pé di ossi la formassion bande tiknissien épi bande zinzényèr lé kapital dann in péi konm la n’ote. An plis i fo baze dsi la solidarité avèk bannzil noute landroi.

An touléka mwin lé pa kapab la pa la solissyon : a bon ékoutèr, salu !

Justin