Oté

Noute prodikssyon agrikol : Dan la kalité nou va trouv noute salu.

Oté

Justin / 25 septembre 2021

Mézami somenn passé mwin la garde par shanss in lémission dossi bande prodiktèr bande zuil éssansyèl dann in péi i apèl Lo Ruanda. Kan mwin la rogardé mwin la vi karo par dsi karo jèrniome. Bande madame i travaye dann jèniome té kontan dire zot i gingn in larjan par zot travaye é sa l’avé zamé ariv azot. Kékshoz konm 30€ par moi.

Mwin lété bien konrtan zot kontantman, mé kan zot la di zot salère sé l’èr kémwin la poze amwin késtyon é mwin la di an moin-même koman ni sava fé issi La Rényon pou siporte la konkiranss avèk banna ?

Pars somenn d’avan mwin la vi bande jenn Sin-Jozèf, dan lé o,apré rolanss la plantassion jèrniome zot aran.Té i fé plézir oir banna konm zot téi mète lo kèr dann travaye. Mé an moin mèm l’avé in pti voi apré di amwin :issi travaye lé shèr, issi bande zintran la pa bon marshé ditou, an pliské sa l’erop la fine tonb d’ajkor avèk lé zot karéman pou touf anou.koman i sava fé ?

L’èr-la, mwin la rapèl in n’afèr é sa i romonte a kék zané déza,mwin la rapèl la vizite in délégassion bande parfumère shinoi téi vien issi pou ashté noute prodikssion léssans pars nou néna la kalité. Nou na poin la kantité mézami, mé nou néna la kalité.

Dann mon kèr mi di : noute tère volkanik lé ékstra, noute savoir fère,sa i mank pa nou, la roshèrch lé possib issi avèk l’irat épi l’inivèrsité. Alor, noute solission lé pa dann la kantité lé dann la kalité.Konm pou la vanille, konm pou lo kakao, lo thé blan , lo kafé Bourbon pointu. La kalité mézami, sé la ké nou va trouv noute salu.

Justin