Néna dabor sak nou noré pi fé é ké nou la pa fé. Pou kossa ? Pars nou la fine pran labitide ashté sak lé inporté-nou lé plizanpliss dann in lékonomi d’kontoir. Biensir néna lésplikassion problème-la é mwin lé sir demoune pli kalifyé ké mwin i pé trouv lo zésplikassion. Mé avan alé pli loin, mi panss sa sé demoune la zamé vouli sanz lé soze alor zot lésplikassion é zéro kalbass, pou mwin lé parèye.

Astère lé tro tar ? Non lé pa tro tar lé zamé tro tar pou nou anbransh dann in révolission an silanss. Lotosifizanss alimantèr sa lé possib é poitan nou la pa fé pars in bande pozèr d’lanspèk la kontraryé noute zéfor. Lotonomi dann lénèrzi, sa ossi lé possib mé kissa la détrui sa, si la pa gouvèrnman la franss avèk son bande kon pliss. Noute dévlopman gmobal sa ossi lé possib é i fo fa.

An atandan : i for épar lo po kassé é sé sak la kassé k’i doi réparé. Dann in ka konm ni lé sé gouvèrnman franssé k’i doi pran an sharj lo fré d’aprosh an atandan ké bande rényoné i fé zot plan dévlopman é i marsh dossi so plan-la. Noute parti la fine fé in ta propozission, d’ote ossi la fé é sré pa mal si téi tienbo konte. Paul Vergès la lans in pan la fé antrovoir anou toute noute kapassité. Pars zordi néna lépidémi, domin nora in katastrof natirèl, apré domin la guèrre, aprésa sansa avn in katastrof imanitère.. Alor, lé pliské irzan pou fé noute prop dévlopamn : li lé possib é li lé nésséssèr.