Pou kossa noute flote la pèsh lé dann sète éta-la ? Pars sé l’érop k’i désside dsi bann kondission pou ronouvèl bann bato sirtou sak néna moinss douz mète é lé inportan pou la pèsh lokal, sète i sava pa trape poisson tro loin, épi lo poisson lé déstiné pou noute konsommassion. Lérop lé krintiv noute bann pti bato i sava vide la mèr… Mé la prézidante konsèye réjyonal i dénonss in fasson oir lé shoz konmsa pars sé bann gro bato k’i vide la mèr la pa bann pti bato. In pé i pèsh par santène tone solman, lézot i pèsh par plizyèr dizène milyé d’tone é forsséman sé lo gro k’i fé déga é pa lo pti.

Madam la miniss i di pou sa par èl i plass aèl koté bann pti pèshèr é sirtou èl i konbate la bann i pratik la pèsh ilégal..Mi panss sa lé néssèssèr pou vréman mé problèm ! opliss i konbate opliss i piye loséan. Dizon sa lé konm la frode fiskal : opliss i konbate ali oplis li rogoumante. Kan i trape inn néna diss i pass par maye. Aprésa i fé in spèss kalkil makote pou évalyé lo volime la pèsh ilégal san z’ète sir lo kalkil i raprosh in pé avèk la vérité. Talèr va dir sé lo pli gro péshèr poisson dan noute loséan sé bann péshèr ilégal.

I paré gouvèrnman La franss i sava mète do boi avèk l’érop pou an avoir lo droi ronouvèl la flote artizanal pars bann pti bato lé pa assé modèrnizé pou in pèsh rantab é an plène sékirité.

Alon atann pou oir mé ankor in kou ni kass noute né dsi in règlomantassion lé pa fé pou nou é nou néna poin okin pouvoir pou gingn mète la préssyon la dsi é avèk sa noute souvrènnté alimantèr ni pé dir néna lo plon dann zél ankor in kou.

A bon antandèr salu