Antouléka i kol pa kan wi antann lo shèf kozé pars lo shèf i ropran sak la droite départantalist té i di néna déza in bon koupe de tan. Lo shèf i di lo mouvman lé départmantalist donk konte lotonomi k’i rouv, parétil, shomin pou l’indépandanss.lo mouvman lé franssé, épi éropéin donk sé dir si lo mouvman i rakokiye ali dsi son bann fondamanto.

Poitan kissa la réklam la loi mars 1946 ? Sirman la gosh é anparmi la gosh lo parti kominiss avèk son zélu DR Raymond Vergès épi Léon Lépervanche. Oussa lété la droite dann tan-la ? E té pa la, é sirman pa pou La Rényon départman franssé.

Poitan el i rovandik son franssité, mé kissa an parmi bann moune sèryé i kontest so franssité ? Pa la gosh biensir é si nouvel’R i réklam sa, el i réklam kékshoz demoune sèryé la zamé kontesté, mèm si souvan défoi bann gouvèrnman téi rokoné pa noute franssité, osinonsa avèk lo boute zot lang é pa avèk zot kèr assiréman.

Poitan si lo nouvèl droite i réklam lo kalité d’éropéin pou bann rényoné sépa si zot néna an mémoir Paul Vergès an promyé la réklame noute kalité d’éropéin konm réjyon ultra-périphérik é toulmoune i koné Paul Vergès é kèl lété son zidé-pa d’zidé droite toulmoune i koné !

Poitan sak i di lotonomi i rouv shomin pou lindépandanss i koné bien lo parti kominis rényoné la zamé domann lindépandanss La Rényon é ni koné sak la di sa é sak la fé kroir d’moune é sa lété inn bann falsifyeur listoir La Rényon.

Mi arète la pou zordi mé mi panss mon bann kamarade i konpran lo bann zidé neuv lo Nouvèl’r sé in bann vyé zidé, tro vyé zidé é la pa zordi la pa domin noute pèp rényoné i sava pa lèss trape ali par bann vyé zidé foss konmsa.

A bon antandèr, salu !