Lo pri l’ésans la goumané, yèr, promyé zour moi d’aout. Li la pran plizyèr santime par lite. In pé, daoir i pans, sa in n’afèr i oi pa, lé inodor, lé indolor. Alé oir ! Mé kan ou i ranpli lo bak out kok loto, l’èr-la, la rogoumantasyon i kont pi an santime mé, bien antandi, i kont an éro. Zour-la, ou i san pasé ! Pou sak i ashté par dis éro, sansa mèm par sink, forsé zot i sava moin loin é zot lé blizé pass pli souvan dann l’éstasyon. Boudikont, zot i dépans plis é si bann moun lo pla lé bien gonflé i rann pa tro kont, pou bann ti kolon la pa la mèm shoz. zot lé blizé lité pou gard zot transpor !
Bann gran Vaza i gouvèrn lo mond épi sak nana la parol pars i konsidèr azot konm demoun kalifyé, va vni dann radyo, sansa dann télé, pou zot di : "Lésans lé kondané a rogoumanté" ! Aprésa zot i larg aou in ta d’kozman dsi bann rézèrv k’i épuiz étsétéra, étsétéra, la ké lo ra. La plipar d’tan i obli dir d’moun konbien larzan bann gran sosyété i fé dsi la tète bann konsomatèr. Mé sa, la pa arienk zordi lé konmsa ! Lé konmsa dépi bèlaz è bo-tan donk konm di lo kont dopi zézikri téi marsh kat pat.
Ni koné, isi sé la Proféktir k’i fiks lo pri lésans. Li kalkil bien ? Li kalkil mal ? Sa ni koné pa, pars sak i apèl transparans, i fo pa koz de sa pou l’pri karbiran. Alor, lo konsomatèr i pèy lo pri lo kontèr i di ali, kan bann shif i dégrenn an vitès inn apré l’ot. I koné pa si i abiz , sansa si i abiz pa. Sa sé in n’afèr, moin pèrsonèl, mi gingn pa siporté é mi pans nana in bonpé kréol konm moin... mèm pa ète kapab di si sé lo pri mi doi péyé, sansa si sé pa lo pri mi doi péyé. Konm di kréol, sa i fé chchchak foi la mèm shoz.

Justin