Mé z’ami, zot i koné sé tan isi moin la antann in bonpé parol moin té i antann solman ziska koméla , dann rényon nout parti kominis. L’èr-la, mi koné pa si l’été moin k’téi antan pa désèrtin moun kozé, sansa si sé banna ké la trok parol toudinkou. Sak i z’afèr amoin in pé sé ké lo bann moun moin la antann-si l’été, z’ot z’idé - la fine gingn san foi l’okazyon pou défann sa é sanm pou moin zot la pa fé. Touléka zot la pa koz tro for pou k’i antann azot.

Sansa, pétète zot i donn pa lo mèm mo ké ni ansèrv lo mèm sans ké nou. In l’égzanp ? Moin la antann in moun bien koni dan la politik, in gran partizan l’antant é l’amityé bannzil l’oséan indien, apré di i fo kant mèm gouvèrnman fransé i abandone in pé son l’atitide é li fors in pé dsi la dékolonizasyon, konm in klé pou in bon l’avnir pou nou é pou lé z’ot pèp, dann l’oséan indien. Donk, pou nou, konm pou li, si mi konpran bien La Frans la pankor poz atèr son manto kolonyal-sansa néo kolonyal. Sé sak ni pans nou, mé mi antann pa lé z’ot parti, lé z’ot z’om politik apré parl sa, é apré di zot i sava lite kont sa.

In l’égzanp : la loi départman fransé nana 70 z’ané é nout parti la prézant in pti liv dsi lo néo-kolonyalis. Mon santiman sé ké nou l’été in pé tousèl pou anons in vérité konmsa é ké d’ot la pa di z’ot l’opinyon la dsi. In n’ot légzanp : kan la fé lo zé dé z’il, mi souvien parti kominis la fé in konférans do près pou défann la dignité bafoué nout kouzin lé z’il komor. Kan la désid tir lo zé dé z’il avèk zot ébin na poin bonpé d’moun la fé antann z’ot protéstasyon. Troizyèm l’égzanp : kisa la fé antann son protéstasyon kan la fé, la-ba Moroni, la déklarasyon la COI san site in foi lo nom La Rényon. Kisa la protésté ? Nout parti é aprésa ?

Donk i fo in pé i donn vréman z’ot konviksyon bien prési, bien détayé. Omoins konmsa nou va oir si nou lé dakor rantre nou !