Kan moin lété profésèr an rézion pariziène, mi domann marmay kolèz si zot la fine voir in cheval ; i réponn a moin dan lo liv paz 24 ; minm lo profésèr o lié d montr in vré zo dbèf, li pran stensil alkol blé, rouz, mov, noir, li désine : os konpak, moal, tèt, os sponjieu, kanal nourisié… li tourn sa dan in diplikatèr i sort in papié par élèv, é voila koman i tourn lo sians natirèl, papié, papié, papié.
Domann pa lo bann marmay lodèr in poul, in chèv, in pork, in létab, minm antr la poul é lèf, li koné pa kosa la fé lot.

Mi trap dé souri dann sak zaliman mon bann kabri, mi anfèrm dan dé bokal séparé ; mi aport lékol ; alala lo diréktèr i di a moin li la pèr bann paran ; zélèv sou sa résponsabilité kab giny maladi ; i rapèl a moin Tahiti ; kankrola nana an poundiak dan la vil, mé aport dé troi zinsèk dan la klas po étidié, i di a ou kab donn lalérzi !
Mé, élèv nout bann zanfan dan koton, la pa bon non pli.
Moin la touzour apri : sé an métan nout kor an prézans antizén (lo bann kor étranzé), ke nout lorganis i fabrik antikor po défann ansuit so bann antizèn (mikrob) atak a nou.
Sé lo prinsip la vaksinasyon.

Kréol la touzour di : « élèv pa out zanfan dann koton, si ou élèv a li tro tann, li pé pa pran la fors po lit kont ladversité ! »
Lozik, élémantèr, mésié Watson !
Pédagozi : sé pou aprann ; fo èt konkré ; donn a li po li tousé, po li santi, po li rogardé ék son zié, lo vré, lobservasion véritab ; lo vivan, aprè na la loup, lo mikroskop.
Tansion, zordu marmay na rienk lordinatèr, sa sé virtièl, sé pa la véritab matièr !
Objé pédagojik ; inn ti souri dan in bokal.

Justin