Oté

Obliy pa : de toutan l’avé -é néna ankor- rényoné dann kan larézistans !

Justin / 21 zanvié 2021

JPEG - 43.6 ko

Matant Zélida la ékrir Justin :
Mon shèr nové, mon spèss salté, rouj-de-fon dovan létèrnité, kossa mi antann azot apré di : Alor solon zot La Rényon, so pti galé dann loséan indien noré té kapab vanz kont lo kovid par li-mèm. Arète in pé fé gonf zot shoviy konmsa ! Pars solon sak mwin la antann épi antann rakonté, shak foi nou la gingn kou d’kongn sé La Frans la vni pou poz pansman. La prèv ? La pa Léopard la libèr anou par raport la diktatir maréchal Pétain ? é si in zour la bézoin, La franss mèm va sokour anou. Tok ! Pran sa pou toué.

Justin la fé pou répons :
Mon vyé matant k’i koz touzour la boush rouvèr, tro kozé sé koz an tro. Pars lé vré sak ou la di dsi lo bato Léopard mé kan bato-la l’arivé, si wi koné pa, l’avé déza bann rézistan issi La Rényon. Focard, sa i di pa ou arien sa ? Lo ga téi rossoi plizyèr pèrsone son kaz pou ékout radio Londres. Lo Prins Vin-Sanh ? Wi koné pa sé li téi rant an kontak avèk bann zanglé bazé dann lil Maurice. Bann sélul kominis Lépervanche dann la komine lo port, wi koné pa non pli, épi lo 1300 zangazé volontèr [1] la arzoinn La frans lib… Matant mi di aou arienk sa pou linstan, mé i fo ou i obliy pa de tou tan bann rényoné la rant an lite kont linzistis. Sa té vré dopi lo komansman nout pèpléman, épi la kontinyé ziska zordi é la pa fini. Tok ! Pran sa pou ou !

[1An parmi l’avé lo dé frèr Pau épi Jacques Vergès é d’ot ankor.