Oté

Obliy pa léssansyèl ! Mé sé kossa léssansyèl ?-promyé morso.

Justin / 11 zanvié 2021

Mézami, si zot lé dopi lontan dann PCR, sansa si zot i suiv ali dopi lontan, dann toutt sak li fé ép dann tout sak li di, mi yèmré poz azot in késtyon. In késtyon par raport son doktrine. Zot i gnor pa parti kominis sir man lo sèl parti rényoné néna in doktrine prop-lé z’ote ossi néna in doktrine mé san dir d’mal anprété avèk in n’ot parti fransé.

JPEG - 43.6 ko

Parti kominis rényoné la pa anprète arien avèk lé z’ot. Méyèr légzanp mi pé done azot sé sak la éspass la konférans Moscou : d’apré sak mi koné, an plin dann sak in pé apèl la kérèl sino-sovyétik nou l’avé in délégué dann in gran sal laba Moscou. La plipar bann parti lété dakor avèk Parti kominiss linyon sovyétik, sof nout délégué-Paul Vergès dann tan-la - la pran la parol dann in silanss glasé épi li a tienbo tète parti kominis l’inyon sovyétik. Avèk bann zarguiman téorik bien préparé épi bien asséné.

Kan nou nora lo tan nou va anparl sa mé pou zordi – sanm pou mwin in bonpé la konm obliyé : parti kominiss la touzour prézant La Rényon épi la sosyété rényonèz avèk son dé kontradiksyon : inn dopi komansman nout listoir nou lété in koni é si zordi nou lé néokoloni, dizon sa i shanj pa gran shoz dsi lo poinnvizé nout kontradiksyon prinsipal : d’in koté in péi avèk in pèp kolonizé, d’in n’ot koté in péi dominatèr kolonyaliss sansa néo. Sa i vé dir lintéré d’inn la pa l’intéré dé l’ot, in lite konm i di rant lo dé zadvèrsèr.

Donk sak lo pèp néokolonizé lé oblizé fé, sé lité pou libèr ali : ni pé apèl sa in lite libérasyon nasyonal. Pou nout parti sa sé in lite obligatoir si lo péi épi lo pèp i vé libèr ali par raport lo néokomonyalism. San rode tro détaye, ni pé dir kan Parti kominis téi amen son lite pou lotonomi, li téi amenn in lite libérasyon avèk son bann métode prop pasifik.

La pankor fini