Oté

Obliy pa léssansyèl ! Mésé kossa léssansyèl ?- dézyèm morso

Justin / 12 zanvié 2021

JPEG - 43.6 ko

Mé li té i obliy pa non pli lite kont bann zinégalité sosyal téi amenn l’ésploitasyon lom par lom konm sa i égzis bien dann lo sistèm kapitalist.

Dézyèm kontradiksyon sé sète i opoz bann travayèr avèk lo sitèm kapilalis. Bann travayèr i rode gingn zot libérasyon sosyal é lo kapitalism li lé kont sa. Li sé l’opréssèr sosyal… ala pou kossa lo PCR la touzour anons son idé d’in sistèm sosyaliss issi La Rényon… D’apré bann déba idéolozik mwin la gingn lokazyon suiv dann PCR ni pé di : néna dé kontradiksyon é par la lite pasifik lo parti la sèye ranport nout dé libérasyon.

Ni pé di résa lé bien ré nout parti dopi son néssans la lite kont lésploitasyon é pou la libérasyon sosyal é sa sé par raport la dézyèm konytradiksyon an parmi nout péi épi an parmi nout pèp... A partir d’la kan Elie Hoarau i di nou lé kominis s épi rényoné sa i vé dir ni kontinyé vanj kont lo dé kontradiksyon mwin la mark an-o la. Pou kossa m i di sa ?sinploman pou bien signalé, nou lé antikolonyalist-sansa néo si zot i vé-épi antikapitalist é sa sé l’éssansyèl, d’apré mwin.

Astèr dopi la fin bann zané katrovin dis ; la Rényon konm lo mond antyé lé dann l’obligasyon lite kont lo dérègloman klimatik : lo prinsipal bnéfisyèr sistèm-la sé lo kapitalism sovaz-konm sak i sort sévi dann l’amérik mésyé Trump é li lé paré pou kass nout lékilib dann l’anvironeman pou agrav lésploitasyon kapitalist... Si nout parti la mète dann son program la lite kont lo dérègloman klimatik sé sinploman pars si la lite i réissi pa sé kaziman la fin di mond. arzout èk sa la lite kont lo dérègloman klimatik sé ossi la lite kont lo kapitalism sovaz. Sak nou la di csé nout dézyèm kontradiksyon.

La fini