Lo moman lé v’ni, dimwin lé pa lwin arivé, vik sé byinto la finn d’lané, lo moman, pou war parlfèt si nou la byin travay lané la, sèt ané 2014, si nou la avans dovan dan nout vi, ousinonsa si nou la kilé, ispé ké nou la kilé osi, gramoun i di touzour, kan ou avans pa dan la vi ou kil, donkalor sé lo moman pou fé in pé lo kont si sak té bon pou vréman, sak nou lé fièr dawar fé, sak té pa bon ditou, boudikont sak nou la ont dé nou minm. Mé sa shakinn va war pou son par, shakinn va fé son bilan shakinn konm i di, donn a nou lo tan pou byin réfléshi la d’si. Mé pou mwin, sanm pou mwin, vi konm sa, lo bilan lé pa tro gayar, firamézir ni avans dovan, dan lo tan mi vé dir, firamézir i tonm pli dir pou viv.

Pa solman pou in pé konm si-konm sa, konm mi antan otour d’mwin, i toushré aproshan nout tout a vré dir, nout tout ni sibi, nout tout ni siport, sof sak néna pou rovann, sak néna an gaspi. Konbyin d’fwa dan lané, dopi promié zanvié ziska trant é in désanm mi antann domoun po souplingn a zot ? Sétaki néna son manièr pou ésplik son ka. Souvan-dé-fwa mi domann a mwin minm, koman bann in pé frèl-frèl, bann prékèr, i fé pou nyinbou tonir, bann moun i travay pa, sak lé o shomaz, sak na pwin la kaz etc ? Déza pou sak lé in pé mwin démini lé dir, parl pi pou lé zot.

Sak lé pli pir ankor sék ni wa pa tro koman sora domin, lané 2015. Ni koné zordi, malérozman ni wa pa pou domin. Pa bozwin lir dann kart pou konprann ké firamazir lo tan i pass, sé firamézir lé pli dir pou nou, nou lé dakor la d’si. Fin d’lané 2014, sé lo moman fé lo bilan 2014 byinsir, mé sé osi lo moman pran bon rézolisyon pou 2015. A mon manièr, mi propoz a zot mon myinn, pran konm i lé. Odrémié pa baz si baton tonton pou travèrs 2015.