Dopi dé trwa zour lo tan la gaté in pé partou la rényon. Rozman na pwin tro lo van, zis In ti tampèt tropikal ki aminm a nou dolo an ponyé. Radié i débord, la ravinn lé plin borabor, mé na pwin pou kas la pat in kanar, pou nou lé in pé dann laktialité vik nou lé ankor an sézon siklonik ziska tanto. Sak mi vé di, la pa bézwin afolé, pa bézwin awar pèr konm lo promié minis la ba déor. Voui, i prétan lo promié minis la pèr. Koué i pé fé pèr a li pou fé koz a li tanksa ? Promié fwa mi antan in minis di li la pèr, li la télman pèr, ké li la pèr ziska langwasman i di.

Kan mi antan sa, an mwinminm mi di sirman li dwa awar pèr pou nou, pou nout gro to shomaz dan lo péi, pou sak na pwin la kaz, pou sak i dor déor dan la fré, donkalor pou nout sékirité. Pétèt li la pèr pou nout domin, pou bann boug i plant kann la rényon, i koné pa koman apré 2017 zot sar péyé, boudikon, mi di, li la pèr vik li an sousié boukou pou nou. Lé pa pousa ditou. Li la pèr, li lé angwasé parské lo fron nasyional i riskab gingn zéléksyon départmantal, li la pèr ké la frans i frakas si lo fron nasyional.

Lé vré pou vréman, zordi lo fron nasyional lé an lèr, sondaz i donn a li vinkèr partou é sirtou vinkèr pou domin é minm apré domin. Néna i di i fo tourn lo do èk la politik lé méné ziska zordi sinonsa lo fron nasyional va kontinié goumanté. Mi konpran pi ryin vik sé lo promié minis li minm ki désid la politik. Poukoué li shanz pa. In vié gramoun la di a mwin, o lièk pèr lo tan, pou mié sobat kont mové zèrb, odrémié pa mèt fimié èk lo pié.