Zordi mi san konm in pé lafolman, konm si nout linyon sirpriz i amay in pé. Pétèt ni komans agas a zot èk nout linyon dé fors de progré pou lo devlopman èk légalité, pétèt ? Linyon PCR – Progrés, Progrés PCR. Sirtou kisa té atann in bèl atlaz konm sa ? Koman tousala la abouti alèrdzordi ? Kisa la di “San laménèr, lo parti kominis i pé pa èt an parmi“. Nou la pa amizé pou fé war nout kapab, pou krwaz lo fèr, natirèlman nou la tonm dakor èk nout zalié natirèl boudikont.

Pou nou lé klèr, ni fé pa linyon zis pou mont d’si lo do lin a lot lo tan zéléksyon rézyonal. Lo laménèr lo progré la di li minm “Linyon ni fé, sé pou o mwin vint an, zéléksyon rézyonal daborinn, aprésa zéléksyon dépité, aprésa ankor zéléksyon minisipal“. Tousala té pa fé dann vid, i prétan, vizavi nout program étidié an lon, an larz boudikont. Vik nou néna in program i tyinbo la rout, èk nout 25 propozisyon, mwin dé té pli fasil pou nou.

Lo kontrèr in program kazinki. Dopi lo tan ni di, lo sistinm aktièl i aminm a nou dann gouf, ala zordi ni trouv in zalié i di konm nou, i fé lo minm konsta ké nou. Si ni sanz pa nout léstati, sé konm si ni bray dann dézèr. In gro diférans èk banna li di li minm “Rényoné sosyalis lé pa konm sosyialis rényoné“. Li di osi, li la pi pèr pronons lo mo otonomi, lé pi inn ti mo tabou pou li. Oila, sa i pé èt inn ti lantrétab !