Mézami koméla néna plizanpliss zafèr pou fatigué kissoi bann zafèr la guèr, kissoi bann zafèr la maladi, kissoi bann krime épi bann lagréssion, kissoi ankor bann fénomène natirèl, kissoi ankor la mizèr épi la fain. Konm ni di rantre nou, issi La Rényon sé in rashkèr — i pé dir ossi in larashkèr. Fransh vérité sé koté lo kèr ké ni soufèr bonpé a oir dé shoz konmsa é dé shoz konmsa sa i anmanke pal o tan ni viv koméla.

Mi rapèl lo tan mwin lété marmaye é ké mon papa téi rakonte a nou son bann zanfan toute tourman demoune téi pass é opliss nou téi grandi, opliss nou téi panss sa lélé dèryèr nou, é lo monde té fini trass in kroi dsi bann tourman konmsa. Malorèzman sa lé ankor d’aktyalité é opliss wi kroi sa lé déyèr ou, opliss sa i aparète dovan ou. Kan wi panss sa lé fini, alé oir sa i rovien ankor avèk in proùmèss pli pir zafèr dann noute lavnir.

Koméla ni mète mla fote dsi lo sistèm kapitalist épi dsi li pèryalisma avèk toute kalité zabizèr néna é toute doulèr lo pti i pass par raporte lo gro. Ni priyèr lo syèl é la tèr, pou k’in tan konmsa i arète méli arète pa é sé pou sa i fo ni rofléshi in bon kou pou oir koman élimine la mizèr imène.

Si ni gingn pa ni pé klant mèm éséyé é ni artrouv pli dvan, sipétadyé.

Justin