Dopi k’son madam i pans li koup an dsou, son kaz na pi bon manzé pou li : arienk ranpang avèk la sos piman. Ranpang, i di osi anpang ! Kosa i lé sa ? Sa la krout do ri in pé brilé kolé dann fon marmite. Mon granmèr téi agas la boush avèk ranpang épi dosik, mé lo moun mi anparl, in boug gayar, bien korporé, kosto konm poto sa i sifi pa pou son travaye dir. Mé son madam i vé pi antann ni gosh ni droit dopi son momon la rakont aèl in krak konmsa. Koman koman li té i kontant sa épi in boushé manzé li té i atrap a la vol la kaz son momon-in momon, sa sé in n’afèr sa ! in vré jar l’or !- Ziskatan rangène la va fini. A ! Ranpang, lé vré li donn pa la fors mé avèk in bouyon d’lo li lé bon pou kour d’vant mé la pa tou lé zour ou néna tralala kant mèm ! Alé ! Mi kite azot rofléshi la dsi é ni artrouv pli d’van sipétadyé.