Médam zé méssyé, la sossyété, koz èk mwin sé koz èk in kouyon mé sé o pyé d’lo mir k’i oi lo masson.

Mézami koméla i ésspass pi konmsa mé lontan oui. Kan in marmaye l’avé trape son kinzan, li téi shoizi kite lékol épi alé grate kann avèk la piosh-lo gongon d’soufranss. Son famiye té pa kont pars, pou in pé, lékol lété sanss interdi osinonsa lékol téi éspass dovan baro é zamé anndan.

Sa té pou bande garsson, mé pou bande fiye lété pa pli briyan pars jenn mèm téi anvoye azot travaye dann mézon é toute fasson lékol té fini galman.

Kossa ni pé dir la dsi, nou lé konte mé sa i romante dann tan é la dsi napoin arien pou fé. Nou lé pour ? Mé ni konpran bien, kékshoz konmsa dann noute sossyété, lé pi possib é orozman.

Alor ? Alor ! Mi kite azot rofléshi la dsi é ni rotrouv pli d’van, sipétadyé.