Néna d’moune la touzour bézwin fé fère in kékshoz z’ot kaz : Kissoi koupe zèrb ! Kissoi aranj in tol ! Kissoi fé mète karo ! Toute fasson dann in kaz é dann in kour ou i trouv pa lo boute zamé. An pliské sa nana demoune la bézoin dé shoz initil. Solman lo ik, sé pass a la kèss. Nana demoun i yèm pa pèye konm k’i fo. Néna in provèrb ki di : larzan lé konm ppoil dann né : wi rash bonpé i fé mal aou, wi rash pti pé i fé mal aou.

Alé pa kroir sa lé valab pou bann pti kolon solman, lé valab galman pou bann gro kolon. Lé valab galman pou bann sosyété ! Antouléka sa sé in n’afèr i ariv pli souvan k’ni kroi. Donk la solisyon ? antouléka wi doi pa lèss aou plimé épou sa wi domande l’avanss é ka n wi oi sa lé pa apréssyé, bare aou. Donk manze o pyé si wi gingn é pétète la lo moune i raze ar pa ou a sèk.

Romark na dé foi demoune i domann l’avanss épizapré rovoir Pyèr, tak baro. L’èrla oussa i lé la klé lo problèm ? Lo klé lé dann la konfyanss é konfyanss lé mor dsou pyé tamarin.

Alé ! Mi lèss azot réfléshi la dsi é ni artrouv pli d’van sipétadyé.