Matante Zélida la ékrir Justin :
Mon shèr nové, mon spès salté, rouj de fon dovan l’éternité, mi sort antann in n’afèr, moin lé sir sa i plézir pa ou. Sirtou sé pars sé madam Bello ké la domandé. Kosa èl la domandé ? El la domann k’i fé in lisé bann métyé la mèr isi La Rényon, ou sinonsa i fé in lékol sipèryèr bann métyé la mèr. Pou kosa sa i risk pa plézir aou ? Inn, pars sé Béllo la nyabou an avoir in l’idé konmsa. Dé, pars sa i vé dir Paul Vergès lé pa in onm indispansab vi ké lé zot lé bien kapab fé lé shoz solon son bann z’idé é san li. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr, m’a dir aou in n’afèr : mi koné pa d’parti, mi koné pa in n’onm politik la fé avans in takon z’idé, konm parti kominis é konm Paul Vergès. Lé zot i pé prann in bout, mé pa latotalité : Inn va prann in l’idé par si, par la, l’ot va prann in propozisyon par si par la... Sa lé posib ! Mé kosa lé pa posib ? Sak lé pa posib sé d’avoir in bon vizyon pou l’avnir La Réinyon, in bon vizyon bann péi nout l’anvironeman épi mèm lo mond antyé dopi in pti galé dann l’oséan indien i apèl La Rényon. Ala sak lé pa posib pou dmoun i oi lé shoz bout par bout é pa dann z’ot totalité. Ala sak lé pa posib pou demoun na poin in vizyon panoramik dsi nout prézan, dsi nout pasé, é dsi nout l’avnir, dsi lo pasé nout lantouraj, dsi lo prézan nout l’antouraj dsi l’avnir nout lantouraj. Parèy pou lo mond antyé.. Tok ! Pran sa pou ou !