Oté

Olivier Bancoult i réponn bann rasis zanglé : Si pou déport anou, déport anou shagos ! Sé laba ni vé alé pars laba nou lé éné !

Justin / 30 zwiyé 2019

JPEG - 43.6 ko

Mézami, zot i koné dopi bann shagosien la parti aport z’ot témoignaj dovan la kour internasyonal La Haye, la ène désèrtin britanik i ménaz pa zot. Zot i koné dopi bann shagosien la fé prosé bann zanglé, tribinal zanglé la done azot lo droi pou ète sitoiyin britanik épi lo droi an avoir in passpor zanglé.
Mé d’apré moin bann zanglé la konprann i pé pa ashté bann shagosien, ni avèk larzan, ni avèk passpor é bann shagosien la fé konprann azot sa pli vite ké zot téi kroi : kisoi dann maniféstasyon, kisoi dann prosé bann kamarad Olivier Bancoult la fé kont gouvèrnman anglé.

Lé vré bann shagosien la pèrd in bonpé prosé mé zot la pa marsh a jnou dovan bann britanik. Mèm si gouvèrnman-la la aplik lo mansonz, la ménas épi tout sort présyon kont nout bann frèr é sèr shagosien.
Pli gran dézast pou bann zanglé sé kan la kour internasyonal La Haye la kondane bann gouvèrnman britanik pars li la pa dékoloniz bann téritoir loséan indien konm li téi doi fé-an palikan lo droi internasyonal.

Dopi s’tan-la bann présyon kont bann shagosien lé plizanpli for. Mi sort lir dann in zoinal moriisien, Défimédia, bann zanglé l’apré fé présyon dsi bann shagosien-mèm sak néna passpor britanik pou kite l’anglétèr épi alé Moris, sansa Sésèl... Dann in gran zoinal anglé i apèl lo Guardian bann zoinalist i amontr bann rasis zanglé la déza déport in santène britanik pars zot lé noir é astèr l’apré rode fé parèye avèk bann shagosien.
Lo konsèye la komine Crawley i trète bann shagosien konm in bann “san domisi fiks intansyonèl”. Olivier Bancoult pou sa par i réponn : si i vé déport anou, akoz i déport pa nou Shagos, sé laba ni sort é sé laba ni vé alé. Sé laba nou lé éné.