Mézami Rényoné, solidèr la lite lo pèp chagossien, mi sorte rogarde zaktyalité dsi Télé Maurice é sak mwin la vi é sak mwin la tandi la rapèl amwin toudinkou toute so bann zané nou l’amenn an solidarité avèk lo pèp chagossien, son mouvman lo group réfijyé chagos, son dirizan Olivier Bancoult… Zordi, laba Maurice Dr Ibrahim Alladin la prézant in liv dsi la lite bann chagossien, in liv listoir la rézistanss lo pèp chagossien dann lo rogar Olivier Bancoult.

Biensir l’avé in bonpé dmoune la vni pou ète an parmi otour d’Olivier épi bann sinbol la lite bann chagossien. Mwin la vi dann télé l’avé in bonpé gran pèrsonaz a koté lo dirijan chagossien, otour d’Olivier. La rokonéssanss pliss sinkante zané la lite pou rotourn dann péi natal ? Sansa lo gran sèrviss bann chagossien la rann lil Maurice dann son konba pou rékipèr son souvrèneté ? Inn fasson romèrssyé toute bann konbatan chagossien la tonb inn apré l’ote, lé mor pou in droi bien natirèl sète lo rotour dann lo péi natal.

Olivier, nou rényoné solidèr la lite bann chagossien ni koné ali é dopi lontan ? Ni koné son bann parol épi son bann diskour, la grande doulèr zot néna pou la pèrte zot paradi dann kèr loséan indien. Ni koné ladmirassion li néna pou son pèp chagossien é sirtou pou bann fam chagoss poto mitan la lite in pèp dopi sinkantan passé. Po d’tèr konte po d’fèr kan dé grann puissanss san réspé pou lo droi bann pèp la déporte azot dann in péi zot téi koné pa épi la ofèr azot park zanimo pou zot rèst dedan..l o onrèst manzé dann poubèl, la matrak épi la prizon, la rézistanss pars arienk sa lé ankor possib kan ou la fine pèrde oute péi.

Mwin lé sirésèrtin asoir bann chagossien épi sirtou bann natif an rèv zot i rovoi zot dèrnyé voiyaz pou rotourn shé zot san ène, san kolèr, arienk pou dir zot lé shé zot anfin. Anfin péi natal, anfin mi rovoi aou, anfin mi anbrass la tèr, é mi ékoute shanté la mèr, anfin ni ariv é toute noute bann soufranss lé oubliyé. Ni rokomanss in nouvo shapite noute vi d’pèp shagossien.

A bon antandèr salu !

Justin