Comité Solidarité Chagos Réunion (CSCR) i sort akèy Olivier Bancoult pou in zourné. Li l’ariv mardi soir é li la roparti zédi matin. So kou isi, li la parti Rodrigues pou rann vizit bann Shagosien i rès la-ba. Somèn pasé, li lété dan l’Anglétèr, pars li la port plint kont gouvèrnman anglé la désid mèt in gran park marin dan bann z’il Chagos, pou anpèsh bann Shogosien rotourn dan zot péi. Nout dalon i arèt pa lité pou défann z’intéré son pèp.
Mèrkrodi, li té La Rényon pou koz avèk lo maksimom médya posib pou done azot in bon l’informasyon a zour dsi la késtyon épi pou rann kont l’opinion. Pa solman sèt La Rényon pars, sanm pou li, si i koz èk bann médya nout péi, son voi v’alé pli loin, dan nout réjyon, dan la Frans épi dan l’Erop. Lé pa égzazéré pans in n’afèr konmsa, é mi pans bann Rényoné i doi èt fyèr zoué in rol konmsa pou done in kou d’min nout bann kouzin shagosien.
Nout dalon i arèt pa lité, i arèt pa travay. Yèr, li la vni galman pars lo CSCR l’avé son l’asanblé zénéral : in onèr pou l’asosyasion-la, in rokonésans pou lo rol li zoué dan la solidarité. Li la vni osi pou anons an dirèk in l’inisyativ son group pou fé sign par l’moun vinn-sink-mil pétisyon pou domann lo rotour bann Shagosien shé zot. Pétisyon-la v’alé la Mézon Blansh dirèktoman avèk Prézidan Obama pou domann ali rogard in kou nout bann kouzin.

Justin