Kansréti pou pa mor kouyon

Zot i koné Olli ? Na poin sa La Rényon mé sa i égzis pou vréman. Sé in pti kar douz plas intélizan. Kosa li gingn fèr ? Li gingn transport de moun, koz avèk lo pasazé pou dir ousa i sava, ousa i arète. Mèm talèr li sar kapab rézèrv in plas pou ou solon l’androi ou i rès : donkalor va vni roda ou dovan out ort épi va transport aou ziska l’androi ou i sava. Biensir san shofèr !

Mi san déza in pé l’apré mazine Justin i déblok ! Tro rogard la télé, la pa in bon afèr ! Mé astèr, si mi di azot la suit, moin lé sir é sèrtin zot va di Justin lé fou, i fo amar ali pou mète ali l’azil si nana ankor.

Pars ala la suit :

D’apré sak moin la lir in gran sosyé té i apèl IBM épi in sosyété i fabrik l’oto la fé lo prozé olli : in pti bis i marsh avèk kouran ou i fabrik avèk in l’inprimant 3d dann n’inport kèl l’androi ou i l é dsi la tèr avèk lo matèryèl k’i fo pou sa épi ou la ashté la pèrmisyon avè lo fabrikèr.

A tou lé kou sa in n’afèr lé bon a savoir, konmsa konm di lo kont, ni mor pa kouyon.