Na dé troi jour, gouvèrnman la désid mète in taks déssi larzan-ramassé bann Fransé, akoz, konm lo shèf i di : « La Frans lé o flan ». Si i vé fé lo RSA, i fo sak nana larzan la bank i pèy, in bonpé si ou nana in bon moné, in pti pé si ou nana in pti moné. Sa mèm la solidarité. Konm mon dalon i di : talèr lé riskab fé pèy amoin moin-mèm mon RSA... Ala k’lindi, dan la nuit, in bank i sava koulé - sa la bank Dexia, avan téi apèl sa krédi lokal dé frans -, alor la Frans i trouv 3 miliar èl lavé bien ramasé, la Belgique i trouve 3 millar galman, é le Luxembourg i trouv kèk santène milion.
Mon bann dalon, zot i trouv pa sa drol ? In miliar pou lo RSA, la poin ! La poin pou san mil pèrsone ! Mé troi miliar pou in bank, nana !
I fo dir, sé pou anpèsh in bank pran lo fon, épi bank-la i fé travay tout bann komine, épi bann départman, épi ankor bann réjion. Donkalor, bon nouvèl pou nout bann mèr, nout bann konsèy zénéral é nout bann réjion ! I pé dir sa konm sa... Sof ké larzan la bank la anpèrd la pa dan la Frans ! La pa dan la Belgique non pli ! La pa dan Luxembourg galman. Sé dan l’Amérik èl la gingn koud-kongn, afors fé lo fou avèk larzan la pa èl, larzan bann koléktivité lavé ranbours aèl ! Alor, sé pou répar sak l’Amérik la kasé k’i fo pèy près sis miliar larzan ? Alor, pou sa, ni ézit pa alé rod larzan ramasé dann kès l’Éta, sansa dann sèk la kès dé dépo. Oté baba ! Poitan, nou té riskab an avoir bien bézoin so larzan-la ! Mé kant i ème, i kont pa !

Oncle Sam, koman ni ème aou don ?

 Justin