Kosa la spass dsi Rényon promyèr lo kinz o soir ? Kosa la spass dann zournal parlé so soir-la ? So soir-la la télé la désid tourn in pti bout fime dsi l’ordonans oktob soisant. Kosa lété sa ? Konm tout rényoné i doi bien ramas dann z’ot tète sé konm ni di dopi lontan sé in salté d l’ordonans in gouvèrnman d’salté la désid pran, pou ramène dan La Frans bann fonksyonèr k’i pé z’ ète danzéré pou l’ord piblik-l’ord kolonyal si zot i profèr !

Moin lété par azar dovan lo pos télé, é moin téi atann banna té i sava fé in bon dosyé la dsi. Mé mi pé dir azot moin lété dési, é pliské dési, pars lo pti bout tan banna la anparl dé sa lété pou sali bann viktime so salté l’ordonans pou sali z’ot vi, pou sali z’ot mémoir mémoir é lo dèrnyé dsi la lis sé nout kamarad Roland Robert, la kite la vi na poin si tèlmann tan ké sa.

Pou kosa zot la fé sa ? Pars zot nana sèrvèl zoizo ? Pars la matyèr griz la pa z’ot prinsipal rishès ? Sansa pars pou zot lé pa grav sali l’onèr bann kominis ? Fé konmsi i kout pa rien pou tonm dosi lo do domoun nout parti ? Poitan, zot i vé, zot i vé pa, nout part la touzour mète ali dann kan la rézistans malgré tout lo risk ké son bann militan la pran é zot i pran ankor pou défann la libèrté épi la dignité é lo droi lo pèp rényoné.

An parmi tousa-la, mèm si la fé koz ali, mèm pa in minite, mi profèr l’onèr in ga konm Pierre Thiébaut son famiy-son papa épi tout la famiy-lété viktime l’ordonans Oktob 60, kan li déklar dann télé, son papa lété otonomis é partizan lo droi pou lo pèp rényoné okip son prop z’afèr. Sé pou sa la mète Georges Thiébaut ! Onèr in moun konmsa ! Onèr pou Pierre, son fis nout kamarad kominis.